OPA

’t Geet van alling, has zelf nieks d’r vuur gedoa
en óp eemoal is die kleekink doa
vanoet zie bedje kiekt ’t teëge dich óp
zoeget lekkesj, doe vrits ’m bauw óp
get sjoeëns, get gevreks um aa te zieë
wat is ’t toch sjoeën um opa te zieë…..

’t is bekind in de ganse famielie
bei mich is ’e ’t leefste d’r klinge Wielie
dat knöake bótter dat sjtuksjke broeëd
zit ’t leefste bei d’r opa óp d’r sjoeët
kriet ’e ing nate boksj, da hoof ich ’m neet mieë
wat is ’t toch sjoeën um opa te zieë…..

heë weëd grutter en reurt al duchtig zie tungsjke
’t weëd al ee keëlke, ee richtig jungsjke
mit zieëve vol tute, sjtols en mit lef
kóm ich mit d’r sjnaak oet ’t sjpielgoodgesjef
gauw noa heem sjpieële en de mam loate zieë
wat is ’t toch sjoeën um opa te zieë…..

’t geet van alling, has zelf nieks d’r vuur gedoa
doe weësj ouwer en veuls ’t is bauw gedoa
vanoet die bed kiek ste teëge ’m óp
d’r jóng is doa, dat móntert dich óp
nog ing kier mit ’m sjpiele, mè ’t geet neet mieë
wat woar ’t toch sjoeën um opa te zieë.